TORTA SEFARDÍ DE GARAVANZOS

TORTA SEFARDÍ DE GARAVANZOS

Os legumes máis tradicionais na nosa cociña son fabas, garavanzos e lentellas. Coas fabas facíase na miña casa "potaxe" e cos garavanzos "callos", tanto así que tardamos anos en aprender que os legumes se chamaban garavanzos, non "callos".

Non coñecía o seu uso para pratos doces até atopar esta receita, escoitando Radio "Sefarad", nome co que os descendentes dos xudeos expulsados en 1492 de España e Portugal, identifican a Península Ibérica. Sefardís son eles e tamén o seu dialecto, que tivemos ocasión de escoitar no Grande Bazar de Istanbul e noutros lugares de Turquía.

A torta pareceume curiosa e, cando a poño de sobremesa, xogamos a adiviñar os ingredientes. Atinan con case todos, agás un, os garavanzos.

Tempo

15 minutos de preparación e 50 minutos de forno

Ingredientes

.- 1 rebanda pequena de pan, a cantidade dunha cunca de café con leite, remollada en leite ou en iogurte natural

.- 400 gr de garavanzos cocidos

.- 175 gr de azucre

.- a corteza ralada de 1 limón, mesturada con canela ou vainilla (un ingrediente anula o outro)

.- 5 ovos

Xeito de preparación:

1.- Esmígase e remóllase o pan no leite ou no iogurte.

2.- Escorremos os garavanzos cocidos, métense nun bol fondo, bótaselles o azucre, a raladura do limón coa canela ou coa vainilla, o pan remollado no leite, os ovos.

3.- Tritúrase todo co batedor ata quedar un líquido cremoso.

4.- Úntase un molde con manteiga ou con aceite e salfíreselle un pouco de azucre polas paredes, ou cóbrese cun papel de forno. Eu prefiro esta opción, porque é máis doado desmoldalo e nunca se pega.

Bótase no molde o líquido cremoso, ponse a cocer a baño maría no forno prequente a 160º durante 50 minutos. Sobe moito e logo baixa. Pínchase cunha agulla para sabermos se está cocido, debe saír seca.

3.- Sácase o pastel do forno e déixase arrefecer.

4.- Pódese presentar así ou recoberto de azucre moído, que lle fornece un aspecto máis chamativo.

Notas

Cómpre botar o azucre moído ao servirmos a torta, para que non desapareza, absorbido polo pastel.

Poden ser garavanzos cocidos de bote, hainos en calquer tenda. Máis saboroso é cocelos nós, logo dun remollo de como mínimo doce horas. Na ola rápida, logo de comezar a asubiar, chegan 25 min de cocción. Nunha pota normal, precisan sobre dúas horas desde o comezo do fervor.