PATACAS AO XEITO DO MEU CURMÁN CARLOS OU PATACAS PICANTES ENFORNADAS

 PATACAS AO XEITO DO MEU CURMÁN CARLOS

(PATACAS PICANTES ENFORNADAS)

Orixinarias dos Andes, no sul do Perú, as patacas arriban no século XVI, máis unha novidade consecuencia das descobertas. A primeira mención en Galiza é de 1574, e o seu cultivo prolifera a partir de 1760. Substitúen paulatinamente as castañas e o millo miúdo, base da dieta dos nosos devanceiros, chegando a ser elemento básico a fins do XVIII.
Do cruce de pápa (da lingua quechua, nos Andes) con batata (do taíno, das Antillas) provén a palabra "pataca" que, en certas zonas, se chama "baloca", "castaña", "castaña de terra" ou "castaña da mariña", apoñéndolle o nome do produto xa coñecido.
Hai pouco introduciuse o cultivo da planta dos chaiotes, provenientes de Sudamérica, e nalgúns lugares de Galiza denomínanse "patacas do aire" ou "patacas do ar".

A receita forneceuma o meu curmán Carlos, fillo do meu tío Antonio, un dos moitos galegos emigrados a Buenos Aires na década dos trinta do século pasado. Carlos apareceu de súpeto na nosa vida, un fillo de emigrantes pretendendo encontrar a súa orixe. Logo de moita busca, achou a súa familia paterna no 2001. Entre todo o que nos deixou, as "patacas ao xeito de Carlos" son desde aquela o noso acompañante preferido para carnes.

Ingredientes

1 Kg de patacas grandeiras

pemento picante

pemento doce

1 dl de aceite de oliva

sal

Tempo

Sobre 10 minutos de preparación e 45 minutos de forno.

Xeito de preparación

 

Cortamos as patacas en láminas gordechas, sobre centímetro e medio de grosor. Salgámolas por ambos os dous lados. 

 

Á parte, nunha cunca, mestúrase o aceite cunha cullerada sopeira de pemento picante e outra de pemento doce. 

 

Mergullamos cada anaco de pataca na cunca e remollámolo ben polos dous lados na mestura do aceite co pemento.

Colócanse nunha bandexa e métense no forno prequente a 180º durante 45 min. 

 

Quedan por fóra cunha costra dura e moles por dentro.

 

Notas

Serven para acompañar carnes enfornadas (año, vaca, porco, coello...), guisadas ou fritas, ou mesmo as patacas soas de pincho cun viño tinto.

Segundo o gusto, variamos as cantidades de pemento, mesturando doce e picante, até obter as dúas culleradas.
Pódense asar ao tempo que a carne.