CREMA DE OVO DE ANANÁS CON CARAMELO DE VIOLETA

CREMA DE OVO DE ANANÁS CON CARAMELO DE VIOLETA

Ingredientes:

1 ananás madura

100 gr de azucre moído

4 ovos

200 ml de leite

manteiga

30 gr de caramelos de violeta

30 gr de maicena

No forno frío, nun molde, colócanse sobre papel de cociñar os caramelos ben separados, enfornando a 180º sobre 10 min até fundírense. Retíranse do forno e cóbrense con outro papel, estirándoos co rebolo até ficaren unhas láminas finas.

Depelícase a piña e córtase en rodelas. Cortamos dúas rodelas en dados pequeneiros, que se douran por ambos os dous lados nun recipiente cun chisco de manteiga derretida uns 3 min a lume forte.

Picamos en anacos o resto da ananás e batémola co leite até ficar triturada e líquida. Engádese o azucre moído, os ovos batidos e a maicena, batendo até integrar todos os ingredientes.

Cócese a mestura nunha ola, a lume manso, remexendo até que espese, aproximadamente uns 20 min. Non pode ferver, pois córtase.

Vértese a crema de ovo nos recipientes. Déixase temperar antes de metelos na neveira. Decóranse cos anacos de ananás e as láminas de caramelo violeta antes de servir.

COSTELETAS DE VACÚN GALEGO AO SAL DE PERSIA

COSTELETAS DE VACÚN GALEGO AO SAL DE PERSIA


Ingredientes:
Costeletas de vacún galego
Bloques de sal de Persia (202x104x26 mm)



A costeleta pode ser de boi, de vaca, de tenreira... Consonte o seu tamaño, cómpre utilizar un ou dous bloques que colocaremos sobre a fonte de calor (gas, carbón...). De ser de indución ou vitrocerámica, precísase un difusor metálico para evitar que o contacto directo das pedras de sal coa fonte de calor as rompa.
O quentamento debe facerse moi ao xeito, comezando a mínima potencia 10 min, logo a lume medio 10 min.
Coa pedra ben quente, colócase enriba a costeleta, cocíñase 4 min por cada costado, virándoa e asándoa até obter o punto de cocción desexado.
Sérvese moi quente, acompañada de ensalada ou patacas frixidas.

Ao cociñarmos coa pedra de sal de Persia, a carne adquire un punto de sal único e especialmente saboroso. Tamén poden asarse nela verduras, mariscos ou peixe.

CHUPACHÚS DE TOMATE CEREIXA CARAMELIZADO CON SÉSAMO

CHUPACHÚS DE TOMATE CEREIXA CARAMELIZADO CON SÉSAMO

Obrigada a Puri, enfermeira do HULA, que me pasou a receita!!!!

Ingredientes:

250 g de tomates cereixa

5 culleradas de azucre moreno

3 culleradas de auga

sementes de sésamo

paus para espetadas ou escarvadentes

opcional: 2 rebandas grosas de pan reseso ou un chisco de aceite

Lavados e secos os tomates cereixa, espétaselles o pauciño na parte do pedículo.

Nunha cunca ou vaso bótase o sésamo cunha altura de 4 cm, para somerxer os tomates.

Deitamos a auga e o azucre nunha pota pequena, quentando a lume medio até que comecen a saír burbullas. Cómpre menear o recipiente para mover o caramelo sen usar culler. Ao ferver, consérvase a lume manso.

Erguemos un pouco a pota dun lado para mergullar no xarope cada tomate até a metade, virándoo para que se molle ben. Inmediatamente somérxese nas sementes de sésamo para recubrir a parte caramelizada. Repítese o proceso con cada tomate.

Para servilos, espétanse nunha rebanda grosa de pan reseso ou colócanse nun prato, para o que cómpre untalo cun pouco de aceite antes de depositar os tomates para evitar que se peguen.

Notas:

En vez de sésamo, poden recubrirse de cáñamo, chía, pó de pistacho ou amenda moída.

De seren longos os paus de espetada pártense en dous.

SALMÓN RECHEO EN PAPILLOTA

SALMÓN RECHEO EN PAPILLOTA

Ingredientes:

1 salmón aberto en libro e desespiñado, pero coa pel

100 g de xamón curado

200 g de champiñóns laminados

250 de gambas ou lagostiños pelados e crus

aceite

sal

papel de aluminio

manteiga

Preparación:

Na peixaría deben tirar a espiña central. Como sempre queda algunha espiña, arrancámolas con pinza de depilar até que, ao pasar a man, nin se noten nin pinchen.

Úntase con manteiga o papel de aluminio e poñemos o peixe aberto coa pel para abaixo.

Sálgase o salmón e úntase con aceite.

Nunha metade esténdese unha capa de lascas de xamón, por riba outra de champiñóns laminados e logo outra cos lagostiños ou gambas en anacos.

Cérrase o salmón e envólvese en papillota moi fortemente co papel de aluminio.

No forno prequente a 180º ásase durante 45 min.

Retírase o papel e sérvese quente.

Notas:

Esta receita fornecida pola miña biblioteca gastronómica particular, a miña amiga Ricucha, pódese facer con troita asalmonada grande.

TORTA DE CABELO DE ANXO CON XAMÓN

TORTA DE CABELO DE ANXO CON XAMÓN

Ingredientes:

Para o cabelo:

1 cabaza de cidra caiota (froito da cidreira caiota)

azucre (a metade do peso da polpa da cabaza)

1 limón

1 pau de canela

Para a torta:

1 lámina de masa de follado (rectangular ou circular dependendo do molde)

200 g de cabelo de anxo

100 g de xamón curado

1 ovo

Facer o cabelo de anxo:

No forno a 100º metemos a amolecer a cabaza enteira 2 ou 3 horas.

Sácase do forno, ponse no vertedeiro e, quente, dáselle un forte golpe ou ábrese cun coitelo para vaciala.

Sepárase a polpa da corteza, retíranse as pebidas. Pésase a polpa. Ponse a cocer a lume manso nunha pota con 1 dl de auga, engádese o limón partido á metade, mexendo de cando en cando para que non pegue, cocerá 30 min. Bótase o azucre e o pau de canela. De novo 30 min a lume baixo, remexendo.

Coa pota tapada, déixase macerar até o día seguinte. Coce de novo 1 hora a lume moi manso, mexendo de cando en cando. Ao arrefecer, retírase o limón e o pau de canela. Se hai algún anaco de polpa que non esfiou, desfaise coas mans.

Montar a torta:

Nun molde, sobre papel de enfornar, estírase a masa, deixando dabondo nas beiras para cerrar a torta. Estendemos unha capa de cabelo, cubrimos coas lascas de xamón partidas en anacos medianos. Dóbranse os lados, estirando a masa para tapar o xamón. Poden ficar anaquiños sen cubrir. Pintamos a torta co ovo batido.

No forno prequente a 200º, enfórnase 45 min. Sérvese quente.

Notas:

A Cucurbita ficifolia (cidreira caiota) dá un froito de forma elipsoide, coa casca verde con manchas brancas, co que se elaboran doces.

De sobrar cabelo, embótase cocéndoo a baño maría 30 min. Gárdase como unha conserva ou conxélase.

Cabe usar cabelo de anxo comercializado.

Moito obrigada á nai de Inés, Miguel e Sara por ternos convidado a degustala por primeira vez.

IOGURTES DE LIMÓN

IOGURTES DE LIMÓN

Ingredientes:

4 iogurtes naturais

1 bote de leite condensado pequeno 370 ml

o zume de 4 limóns

serraduras de tona de limón (opcional)

canela (opcional)

Elaboración:

Mestúranse na batedora os iogurtes, o leite condensado e o zume dos limóns. Repártese a crema en recipientes individuais e deixamos repousar 24 horas no frigorífico.

Ao servir, esparexemos por riba da crema un chisco de canela ou serraduras de tona de limón.

Notas:

Resultan máis saborosos de seren iogurtes caseiros. E máis cremosos se a base son iogurtes gregos.

SÉMOLA CON PIÑÓNS E NOCES

SÉMOLA CON PIÑÓNS E NOCES

Sobremesa de orixe turca, á que nos convidou Luci do Barco alá polos anos noventa.

Ingredientes:

Medida, un vaso de iogurte (125 ml)

1 vaso de leite

1 de auga

1 de sémola de trigo

1/2 vaso de azucre

50 g de piñóns galegos (non chineses) ou noces troceadas

1 cullerada de manteiga

mel ou canela

. Nunha tixola a lume medio derrétese a manteiga. Refogamos nela os piñóns ou noces e a sémola de trigo, remexendo con culler de madeira 5 min até ficar ben tostada.

. No entanto, nun cazo quéntase o leite, a auga e o azucre, sen que chegue a ferver.

. Incorporamos a mestura de liquidos moi ao xeito porque co contraste de temperaturas pode salpicar, mexendo até a sémola absorber todo o líquido.

. Apágase o lume e cóbrese o recipiente cun pano e co testo por riba. Debe repousar unha hora.

. Coa man esfarélase a masa, repártese en cuncas ou pratos e botámoslle o mel ou a canela.

Notas:

É mellor usarmos saborosos piñóns galegos (algo máis caros), pois os chineses (máis baratos) son insulsos e non teñen ningún sabor.

De querérmola máis doce, bótase 1 vaso de azucre.

Dependendo do tamaño dos gránulos de trigo, coñécese como sémola (superior a 0'4 mm) ou semolina (inferior a 0'2 mm).

LOMBO DE PORCO CON ANANÁS

LOMBO DE PORCO CON PIÑA OU ANANÁS

Máis unha das moitas receitas da miña amiga Ricucha.

Ingredientes:

1 lata de piña en almibre de 400 g peso neto

1 Kg de lombo de porco

sal

pementa negra moída

100 ml de aceite de oliva

100 g de entreteto ou touciño entrefebrado afumado

. Salgamos a carne e bótaselle a pementa negra moída.

. Nun recipiente, quéntase 50 ml de aceite. A lume forte e virándoo, dóurase o lombo por ambas as partes durante 5 min para selalo. Xa dourado, reservámolo.

. Nunha bandexa para enfornar, esténdense 50 ml de aceite e colócase a carne.

. Por enriba e polos lados do lombo, cubrímolo coas lascas do entreteto. Sobre o touciño entrefebrado afumado, colócanse as rodelas de piña por enriba e polos lados. Bótase todo o almibre (ou caldo de azucre) da lata.

. No forno prequente a 200º C, ásase durante 1 hora 15 min.

. Compróbase cun pincho se está cocido. De non estalo, enfórnase 15 min máis.

. Sérvese quente, partido en toros.

Notas:

Pódese empregar xamón de porco celta no canto do entreteto.