CREMA DE CAQUIS E CACAO

 CREMA DE DIÓSPIROS (CAQUIS) E CACAO

 Ingredientes 

2/3 dióspiros depelicados e cortados en anaco

1/2 banana ou plátano maduro

2 culleradas de cacao en pó sen azucre (ou 30 g de cacao, o tamaño das culleres de sopa)

Elaboración

1.- Depelícanse os dióspiros, córtanse en anacos. Bótanse nun recipiente de batedor eléctrico.

2.- Móndase o medio plátano maduro e córtase en anacos. Métese no recipiente do caqui.

3.- Bótase o cacao e bátese até obter unha crema sen bolos.

4.- Repártese en vasos ou moldes individuais e déixase arrefecer no frigorífico cando menos 4 horas.

Notas

Pódese facer con manga de non querer usar caquis ou dióspiros.

Mellor duplicar os ingredientes, porque se conserva no frigo 4 ou 5 días.

BACALLAU SKREI DE RICUCHA

 BACALLAU SKREI DE RICUCHA

Marzo de 2022

O SKREI é un bacallau nómada. "Skrei" significa"nómada" en noruegués antigo. Este peixa migra desde as frías aguas do mar de Barents en Noruega cara ás illas Lofoten, onde desova e onde se captura nos meses máis fríos do ano. 

Este peixe está en comida desde febreiro até principios de abril, que é cando se pode adquirir no mercado. Tamén se pode conxelar e conserva todas as súas propiedades.

 

Ingredientes para tres persoas 

Bacallau fresco Skrei, un toro por persoa

2 cebolas grandeiras

2 pementos vermellos grandeiros

3 patacas medianeiras

aceite

sal

 

Elaboración

1.-  Pártese a cebola en aros e fríxese en aceite quente, moi ao xeito, a lume moi manso, até ficar cociñada e case dourada. Retírase a cebola do aceite e resérvase.

2.-  Fríxense as patacas cortadas á panadeira cun chisco de sal durante 2 ou 3 minutos.

3.- Fríxense os pementos en tiras, poden fritirse xunto coas patacas, mais eu prefiro fritir os pementos no aceite das cebolas.

4.- Nun recipiente para o forno colócanse dúas capas da patacas á panadeira fritas por fóra.

5.- Sobre as patacas esténdese a cebola mesturada cos pementos, formando outra capa que cubra as patacas. Por riba, van os toros de bacallau fresco. Sálgase o bacallau e por riba éstrase o aceite de frixir cebola e pemento.

6.- Métese no forno prequente a 180º durante 15 minutos. Comprobar se está no punto de cocción e, de non estar, cociñar outros 5 minutos.

7.- Servir quente.

PATÉ DE CHAMPIÑÓNS E NOCES

 PATÉ DE CHAMPIÑÓNS E NOCES

Ingredientes 

300 g de champiñóns 

1 cebola branca picada moi miúda

2 dentes de allo picados

30 g de noces, sen casca e picadas

50 g de miolo de pan sen a codia

30 ml de AOVE

sal

pementa negra

 

Elaboración

1.- Lavar e torar os champiñóns.

2.- Nunha tixola, co aceite quente, ásase a cebola e os allos a lume manso até ficar  translúcida, sobre 5 min aproximadamente.

3.- Bótase sal e pementa á vontade.

4.- Engádense os champiñóns, mestúrase e cociña todo xunto sobre   min, até estaren dourados.

5.- Nun recipiente, déitase a mestura quente, o miolo de pan esmiuzado, as noces picadas, un chorro de AOVE.

6.- Bátese co batedor eléctrico até obtermos unha mestura homoxénea.

7.- Compróbase o sal e a pimenta.

8.- Consérvase no frigo. O sabor aséntase dun día para outro. 

 CONSERVA DE XARDA EN VINAGRETA

A mellor época da xarda é de febreiro a maio, cando máis rica está e máis barata.

Ingredientes

 .- xardas, mínimo 3

4 dentes de allo

600 ml de Aove

2 ou 3 follas de loureiro

pementa en grao, negra e rosa

romeu fresco

tomiño fresco

175 ml de vinagre de mazá

A xarda ten que estar limpa, sen cabeza e aberta á metade.

Elaboración

1.- Cocemos a xarda en auga con loureiro e sal durante 5 minutos desde que comece o fervor

2.- Fría xa a xarda, elimínanse as espiñas e a pel, procurando deixar os lombos enteiros,

3.- Nunha pota ponse o aceite, vinagre, pementas, loureiro, dentes de allo laminados, sal, romeu e tomiño. Déixase ferver e báixase o lume ao mínimo (máis ou menos 3 sobre 10), deixando a esta tempresatura sobre 10 minutos. Apágase o lume e déixase arrefecer ou temperar.

4.- Colócanse os lombos de xarda limpos nun recipiente, a poder ser de cristal, con tapa con moito xeito e cóbrese coa vinagreta. 

5.- Déixase tapado na neveira un mínimo de 24 horas para que repouse, antes de comer ou envasar. Consérvase na neveira tapada sobre 10 días e pode embotarse.

 TORTIÑAS DE CENOURA

Receita de Anna, sacada do seu blog https://www.annarecetasfaciles.com/

Ingredientes

200 g de cenouras (sobre 3 ou 4 cenouras)

150 g de fariña de trigo

100 ml de leite

2 ovos

aceite

50 g de azucre moreno

1/2 culleradiña de canela

1/2 culleradiña de noz moscada

8 g de lévedo en po (1/2 do sobre habitual)

1 pisco de sal

Elaboración

1.- Móndanse e rélanse as cenouras

2.- Mestúranse os ingredientes seguintes: ovos batidos + azucre + leite + canela + noz moscada + sal. Bátense ben A MAN cun batedor de globo,  A MAN

3.- Engádese a cenoura relada, mestúrase, a fariña peneirada e, ao xeito, o lévedo.  Remexemos até integrar todo.

4.- Untamos unha tixola con aceite, só untada. Quentamos a lume medio (sobre 6.5/7 de mando sobre 10). Colocamos culleradas de masa na tixola sen que se toquen (sobre 4)

5.- Cocíñanse a lume medio por un lado até que aparezan burbulliñas na masa. Víranse e frítense polo outro lado. 

6.- Quentes é como máis ricas están, poden cubrirse de marmeladas variadas.

7.- De sobrar masa, pódese gardar no frigo tres ou catro días e facer as tortiñas cando se vaian consumir. Así están quentes.

 MASA DE CROQUETAS DE XAMÓN E QUEIXO NO MICROONDAS  MÁIS UNHA VARIANTE DE ESPINACAS CON QUEIXO DE CABRALES

Ingredientes

65 g de fariña de trigo

1 cebola pequena

75 g de xamón serrano

75 g de queixo manchego tenro

2 ovos

500 ml de leite

65 ml de Aove

pan relado

sal

pementa

Elaboración

1.- Pica o xamón en anacos moi pequenos, rela o queixo, pica a cebola e reserva

2.- Nun bol apto para microondas, con 3 litros de capacidade, pon o Aove, a cebola picada, e un chisco de sal. Mestura ben e quenta sen tapar 3 minutos a 800 W

3.- Engade a fariña, mestura ben co garfo e quenta 1 minuto 30 segundos a 800 W

4.- Verque o leite, sal, pementa, quenta en dúas quendas de 3 minutos a 800 W

5.- Agora a bechamel estará espesa, tritura co batedor para desfacer os bolos.

6.- Engade o xamón e o queixo relado. Mestura ben e quenta 2 minutos a 800 W. Rectifica o sal. Quenta outros 2 minutos a 800 W.

7.- Deixa enfriar a masa no mesmo recipiente, iso di a receita, mais eu pasei a masa a un recipiente rectangular.

8.- Dá forma ás croquetas. Rebózaas en fariña, ovo e pan relado.

9.- Conxela as que non vaias usar.

 VARIANTE DE ESPINACAS CON QUEIXO DE CABRALES

Os mesmos ingredientes da anterior receita, agás o xamón e o queixo, que substituíremos por 100 g de espinacas cocidas e escorridas e por 75 g de queixo de Cabrales ou queixo azul.

 

 XARRETE GUISADO, DE CARNE DOS ANCARES...

Ingredientes:

.- 800 g de carne de xarrete ou para guisar, eu fágoo coa carne de tenreira dos Ancares, que compro na cooperativa A Carqueixa, o sabor dos Ancares.  https://www.osabordosancares.com/

.- 750 g de patacas pequenas 

.- 1 culleradiña de sal

.- 1 litro de caldo, feito con concentrado de ave ou de carne.

.- 1 vaso ou 200 ml de viño

.- 2 cebolas

.- 4 dentes de allo

.- pirixel

.- sal

.- azafrán en po ou en fías

Elaboración:

1.- Cortar a carne en tres trozos grandes

2.- Esmagar no morteiro sal, perexil e allos.

3.- Impregnar a carne co mallado

4.- Na tixola co aceite a temperatura baixa, douramos as cebolas cortadas á xuliana sobre 10 ou 15 minutos. Xa douradas, retíranse as cebolas.

5.- Na mesma tixola e no mesmo aceite, quente, dóurase a carne por todas as partes para selala ou "asustala".

6.- Coa carne dourada, engadimos o caldo quente, o viño, a cebola reservada.

7.- Coce DÚAS HORAS tapado, a lume medio-baixo.

PATACAS

.- De seren pequenas, frítense en abundante aceite quente cunha areíña de sal, dóuranse sobre 3 minutos por cada lado. De seren grandes, pártense en anacos grandes e dóuranse sobre 3 minutos por cada lado.

8.- Na pota coa carne bótase o azafrán e as patacas e déixase cocer xunto como 10 minutos.

9.- Apágase o lume e déixase repousar 10 minutos antes de servir.